Hondarribiko Aralar

Palestinako arazoaren aurrean Hondarribiko Udalak agertzen duen sentsibilitate eskasa salatu du Aralarrek

2011-03-12T17:41:00.002+01:00

Hondarribiko Udalak Israelgo Enbaxadarekin antolatu duen ekitaldiaren aurrean, Udalak Palestinako arazoarekiko agertzen duen sentsibilitate falta salatu nahi du Aralarrek. “Palestinako herria pairatzen ari den zapalketaren aurrean Israelen propaganda hutserako den ekitaldia antolatzea eta gainera hango enbaxadarekin batera egitea etikoki ez dela onargarria uste du Aralarrek”, agertu du Eñaut Elizegi Hondarribiko Aralarreko bozeramaileak eta hautagaiak.

Zentzu horretan, Aralarrek gogoratu du Israelek etengabe urratzen dituela giza eskubideak. “Neurri horretan, ez da onargarria haiekin elkarlanean jardutea”, esan du Elizegik, eta ohartarazi du Israelek ez duela betetzen nazioarteko zuzenbideak eskatzen duena.

Udal langileen egoera

2010-11-30T17:12:00.003+01:00

Hondarribiko udaleko langileek beraien kezka adierazi zuten azken osoko bilkuran, azaroak 25ean. Zehazki, errege-dekretuz Madrilek inposatuko duen %5eko jaitsiera pairatuko dute soldatetan.

Alkatearen arabera, %2,86ko jeitsiera edukiko dute 2010an, urtearen erdialdean sartu zelako neurri hori. Hau da, dagoeneko indarrean dago eta jaitsiera luzerako izango da.

Udal gobernuaren arabera, ez dago defizitik gure diru-kutxan baina neurria bete beharra dago. Ezin da ordaindu langileei bidegabe kendu zaien diru-zati hori.

Ongi dago udaleko diru-kontuak defizit-gabeak izatea, baina oso argi geratu da udal gobernuak ez duela erreparorik langileei ordainarazteko krisiaren eragin bortitza. Inolako errurik gabe, ahulenak ordaindu behar du.

PSE alderdiaren jarrerak harritu gaitu. Abstentzioa izan da haien aukera, haien alderdikideek inposatua izan arren. Ez dute PSOEren gobernuaren neurria babestu, besteak behartuta baiezkoa eman behar izan duten arren. Orduan, zergatik ez dute abstentziora jo udal gobernuko zinegotziek? Eta zergatik ez du PSEk naurria babestu? Tamalgarria.

Indarkeria mota ororen biktimak aintzat hartzeko urratsa

2010-10-04T18:50:00.005+02:00

500.000 € bidegorriarentzat

2010-10-01T15:09:00.009+02:00

Hondarribiko udalak 500.000 € aurrekontua onartu du bidegorriak egiteko. 900 metro bidegorri egiteko, zehazki. Ia erdia (175.000 €) udalak berak ordainduko du, eta gainontzekoa Feder Europako erakundeak, Circuldouce sarearen baitan (Baiona-Iruña ibilbidea). Gipuzkoako Foru aldundiak ere etorkizunean lagunduko omen du, Irun-Hondarribia lotzeko.

Baina Hondarribitik zehar egingo den kilometro eskasa aztertu dezagun. Bidegorri hori nola egingo da?

Eman dezagun 2,5 metro zabaleko bidegorria egin nahi dugula. Egokia eta erosoa, txirrindan ibiltzeko:

- Oinarria edo bidegorriaren azpialdea: 20 €/m² x 2,5 m = 50 €/ml

- Asfaltoa, nahi den kolorekoa: 20 €/m² x 2,5 m = 50 €/ml

- Ertza edo bordilloa, harrizkoa: 60 €/ml

Beraz, bidegorrian ibiliko garen metro bakoitza 160 € kostatuko zaigu. Eta ibilbidea 900 metro direla kontuan edukita, guztira 900 x 160 = 144.000 € kostatuko du ibilbide osoak.

Tira, hori kalkulatu ondoren, alkateak komentatu dezake, agian, ba, oinezkoentzako espaloi zabal bat edukiko duela ondoan, Hondartza kiroldegi aurrean bezala. Jar dezagun denera 5 metro zabal izango dela (oinezkoentzat 3,5 metro):

- Bidegorria, kalkulatu duguna: 160 €/ml

- Oinarria: 20 €/m² x 3,5 m = 70 €/ml

- Ertza edo bordilloa, harrizkoa: 60 €/ml

Hau da, 290 €/ml ibilbide osoan (900 metro) eta guztira 261.000 € kostatuko luke, oinezkoentzat kriston paseoa eginda bidegorriaren ondoan.

Hortaz, nolatan 500.000 € eskatu behar direla? Eskatzea libre da, Europak berehala jarriko ditu mugak, baina… udaletxeak jarri behar zituen 175.000 €-ak zer? Beharrezkoak dira, ala ez da serioa iragarri duena udaletxeak?

Eta larriagoa dena, zergatik 900 metro bakarrik? Gipuzkoako Foru Aldundiak egin behar omen du falta den zatia Irunekin lotzeko… eta udalaren 175.000 €-ak behar bezala erabiliaz lanak aurreratuko balitu Hondarribiko udalak?

Aspaldi eginda egon behar zuen Hondarribia-Hendaia bidegorri zatia, Circuldouce sarean egon edo ez. Eta ez du balio ardura gainontzeko erakundeei egoztea.

KALEAK MENDIAN, ETA GAINERA, PRIBATIZATUAK

2010-08-01T20:23:00.004+02:00

Mendian ibiltzen garenok ez gara gutxi. Hondarribian baditugu senda bideak, baina orokorrean, mendi guztiaz gozatzeko eskubidea beharko genuke. Jaizkibelgo magala urbanizatzea, hau da, kaleak egitea eta segidan etxebizitzak kezkaz ikusten dugu Aralarretik. Urbanizazio pribatu bat sortu dute Farola gainean, berez lurzoru ez urbanizagarria beharko lukeena, Hondarribiko Udalak etxebizitza-eraikin isolatuak egiteko baliatu du.

Argazki hau Farolako bidean atera genuen (Hondarribiko itsasargi ondoan). Bertan, kale baten erdian, ataka bat jarri dute. Argi dago, beraz, ate horretatik aurrera jabetza pribatua dela. Kale pribatua, mendian. Urbanizazio honen kudeaketa-prozesua aztertzeko modukoa da, edo alkateari azalpenak eskatzerainokoa, gutxienez.

Baina horren kezka adierazteaz gain, jasangaitza egiten zaigu orain arte bide irekia zena, publiko zena (eta bertatik igarotzeko arazorik ez zegoena) horrela ixtea.

Oso pentsatzekoa da Udal Gobernuaren hirigintza-politika. “Mendian gora eraiki dezagun!” izan daiteke gure Gobernuaren eslogana. Eta, jakina, etxetxoak bakarrik egiteko, babes ofizialeko etxebizitzak gehiago bultzatu ordez.

GARBIGUNE BERRIA ETA HONDARRIBIKO ORDEZKO ARAUAK (ARAU SUBSIDIARIOAK)

2010-08-01T18:51:00.010+02:00

Garbigune berri bat eraikitzeko helburuarekin, egun indarrean dauden Ordezko Arauak aldatzea onartu zuen Hondarribiko Udalak, uztaila bukaeran. Ohitura duen bezala, gure udalak gauzak epe luzera antolatu gabe egiten jarraitzen du. Herrian beharrak agertu ahala hartzen ditu erabakiak udal gobernuak, berezko moduan, espontaneoki, etorkizunean gehiegi pentsatu gabe.

Garbigune bat egitearen ideia, seguruenik, Atez ate programa eta errauskailuaren eztabaidak indartuta dator. Aralarrek aspaldidanik defendatu izan du zabor-bilketa hobe eta eraginkorragoaren beharra, eta hortaz, Garbiguneak bezalako ekimenak ere babesten ditu, besteak beste.

Arazo nabariena, Garbigunearen kokalekuan dago. Gaur egun egokiena izan daitekeena, etorkizun batean, agian, ez litzake horrela izango. Konkretuki, Hondarribia zabaltzen ari den eremuetan egitea erabaki du udalak, etorkizunean eraiki daitezkeen etxebizitzak guztiz baldintzatuz. Ez da behar bezala landu onartu berri den kokapena. Beste hainbat gauza egitea galaraziko du Garbigunea leku horretan ezartzeak.

Udal Gobernuak ez ditu gauzak behar den seriotasunarekin landu eta garatzen. Horren lekuko, ia duela 15 urte onartu zen hirigintza araudia dugu (Ordezko Arauak). Zaharkitua; ez die erantzuten Hondarribiak gaur egun dituen beharrei. Gainera, ordutik onartu diren legediak ez dira aplikatzen, eta onurak besterik ekarriko ez lituzkeen eskakizunak baztertzen dira (Babes Ofizialeko etxebizitza gehiago, parke eta plaza gehiago…).

Irunek egin duen bezala, Hondarribiak ere hirigintza araudi berria behar du: Plan Orokorra. Herriaren etorkizuna behar bezala planteatu eta erabakitzeko. Hirigintza planteamendu askoz ere serioagoa, landuagoa, pentsatuagoa eta eraginkorragoa. Garbigunea ongi pentsatutako lekuan egiteko, etorkizuneko auzoak ongi egiteko eta, batez ere, herri hobeago bat edukitzeko.

UDAKO PANKARTAK

2010-07-19T22:47:00.006+02:00

Uda honetan, beste ekintzekin batera, pankarten jartzearekin gabiltza. Biribilgunetan, zubitan, hormetan, hainbat motako hesietan...

Zubi gainetan pankartak jartzearena aspaldiko kontua da. Gaur egun aldiz, ez dira lehen bezain beste ikusten. Hainbat arrazoi egon daitezke, baina zein azkar desagertzen diren izan daiteke arrazoi horietan nabarmenena.

Gipuzkoako beste herrietan gure pankartek pairatutakoa aztertzen badugu, argi dago INDEPENDENTZIA jartzen duen kartelen ezinikusia gizarteko zein sektoretik datorren:

Hala eta guztiz ere, ez zuten pankarta osoa kendu, haren korapilo bat baino gehiagorekin saiatu ziren arren. Seguruenik, bertan idatzia zegoena irakurri, eta zatitxo bat kentzea besterik ez zitzaien bururatuko.

Dena den, Pankarten kentzearena beste batzuen eskutik dator. Gipuzkoako beste herri batean, espainiar polizia autonomikoaren erabakiz (jartzen ari ginela, kentzen lagundu ziguten), pankartek errepidetan sor dezaketen arrisku-egoera medio, zubietan ezik edonon jarri genitzakela esan ziguten. Esan ez zigutena: udaleko langileak gure pankarten atzetik zebiltzala.

Gauzak horrela, hesiaren barnealdetik jarri arren, pankartek Amuteko zubian ordu batzuk iraun zuten. Blog honetan aldiz, luzerako egongo dira.

AIREPORTUAREN BERREGITURAKETA; ZABALTZEA EZ

2010-06-07T11:15:00.003+02:00

Hondarribiko aireportua marko konkretu eta mugatu baten kokatua dago. Zehazki oso mugatua aurkitzen den ingurune natural batean, arrazoi desberdinak medio: ingurumen arrazoiak, sozialak eta segurtasunekoak.
Ingurumen arrazoiei dagokienean, gogoratu behar dugu, Natur gune babestu baten ondoan kokatzen dela, eta bertan hegaztien interes bereziko gunea aurkitzen dela. Eta aireportua zabaltzeak eragin kaltegarria eta zuzena izango lukeela: natur gunean, errekastoan, ondorioz mareetan eta hegaztien I.K.L.an. Hegaztien kasuan ere, hegazkinen segurtasuna arriskuan jarriaz.
Segurtasun arrazoiei dagokienean, gogoratu dagoeneko duen presio urbanistikoa. Eta segurtasunari dagokionean beharrezkoak direla OAZIk ezarritako segurtasun neurriak betetzea, horien artean “serbidunbre aeronautikoak”. Hondarribiko udal hiri planeamenduan aplikatzen dena, hain zuzen ere aireportuaren presentziagatik, eta eraikuntzen altura baldintzatzen dutenak. Gaur egun pistatik hurbilen dauden eraikuntzak, pabelloiak altuera baxukoak dira eta Mendeluko etxeak (Los Planetas) deitzen direnak mugan aurkitzen dira % 2 pasa gabe (serbidumbre aeronautikoen gehienezko portzentaia % 2a baita, hau da, pistatik 100 metrotara dauden eraikinak 2 metrotako garaiera baino gehiago ezin dute izan, 200 metrotara daudenak 4 metro baino gehiagoko garaierarik ez, 300 metrotara daudenak 6 metro baino gehiago ez, eta abar….).
Beraz, pista handitzean “serbidumbre aeronautikoak” aldatu egingo lirateke, eta ondorioz ez lukete bakarrik eragina izango etxe bakar batean eta pabelloietan. Ondorioz, etxeak bere horretan mantenduko balira derrigorrezko segurtasun neurriak (OAZIk ezarritakoak) ez lirateke beteko, egoera oraingoa baino arriskutsuago izanez da bai bizilagunentzako eta bai hegazkinentzat. Edo bestela, nola eraikuntzen altuera ezin denez txikitu, ingurune guztia bota egin beharko lukete.

Guzti horrengatik, ARALAR Hondarribiko pista handitzearen, zabaltzearen aurka dago. Baina argi utziaz ez dagoela inondik inora Hondarribiko aireportuaren aurka.
Horregatik, egokia deritzogu aireportuak eskaintzen dituen zerbitzuetan berregituraketa aurrera eramatea, bertako azpiegiturak hobetzea, ondorioz aireportua gaur egungo garaietara egokituz maila guztietan.

Beharrezkoa ikusten dugu, gaur egun bi administrazioetan banatua dagoen Euskal Herrian, bi lurralde historikoen artean elkarlana bideratzea. Hau da Gipuzkoa eta Lapurdi artean elkarlana bideratzea, Hondarribitik kilometro gutxitara Biarritzeko aireportuarekin aurkitzen baikara eta ez daukalako inongo zentzurik nazio ikuspegitik bi azpiegitura elkarrengandik hain hurbil egonik, elkarren konpetentzia izatea. Pentsatzen dugu, azpiegitura bi hauek elkarren osagarriak izan behar direla, horretarako bitarteko desberdinak garatuz. Eta bide horretan mugaz gaindiko garraio publikoa sustatzea eta indartzea ezinbestekoa eta lehen pausoa dela deritzogu.

KOFRADIA ZAHARRA

2010-06-07T10:46:00.008+02:00

Azken asteetan Hondarribiko kofradia zaharrari buruzko eztabaida egon da. Herritar batzuen ekimena dela medio, galdezka hasi dira posible ez ote litzakeen XX. mende hasierako kofradiaren berreraiketa. Bide batez, udalak hor inguruan proposatzen duena hau da: Itsas Etxearen alboan dagoen "karroa" eraikina arrantzaren interpretaziogune bilakatu.

Portuko elizaren atzealdean egingo litzake, orain arte libre egon den espazioan (petrilaz inguratua). Eraikina berreskuratzeko argudioen artean, Hondarribiaren arrantza-funtsa mantentzeko egokia litzakela aipatu da. Museo edo interpretaziogune moduan erabiltzeko izango litzake berreraikitako eraikin hori.

Gure ustez, hasiera batean ideia ona izan daitekeena (aspaldi botatako kofradia zaharraren balioa aztertzen hasi arte, behintzat), ekarpen interesgarri bat dauka: arrantzaren mundua bilduko duen eraikin bat egitea (museo edo antzekoa). Eraikin zaharra, dagoeneko ez da existitzen, eta ez da kasualitatea. Gaizki zegoelako eta jada inolako baliorik ez zuelako bota zen, bere garaian. Hau da, duela gutxi arte (bi mende) ura besterik ez zegoen bertan. Beraz, ez du balio arkeologiko edo historikorik. Memorian besterik ez dago (eta argazkiren batean).

Hala ere, udalak proposatzen duen interpretaziogune berria "karroan" egin ordez, kofradia zaharra zegoen lekuan egin daiteke. Eraikin horretan, garai bateko kodradiaren argazki handi bat jarri daiteke (eraikin berriaren sarreran, adibidez), jende jakin baten memorian bakarrik egon ez dadin. Baina eraikina garai berrietara ongi egokituta beharko luke izan. Hare gehiago, Itsas Etxea bezalako zabaltze obren inguruan bada.